Wo is Bronkhorst?

Liabe Kultuaredaktion,

letzt’s Moi hob i Euch vazäiht wia i mit meim oidn Ope und meina Frau noch Gelderland, des is a niederländische Provinz, gfahrn bin und mit dort de Schdod Züpn ogschaut hob, wo’s a Klo mittn in da Kirch gem hod. Aba des war no ned ois in Gelderland. Danoch woit ma auf Bronkhorst fahrn. Des is de vielleicht kleanste Schdod von ganz Gelderland. Des war iatz aba aa de Schwierigkeit, dass de so kloa is. De muaßma easchd amoi findn, no dazua, wenn da oide Ope koa Navi hod und i bloß an Autoatlas vo neinzehnhundadneinaneinzge. Mia, i, da Ope und mei Frau fahrn oiso vo Züpn auße Richtung Südn oder Westen auf da Umgehungsschdrass Richtung Arnheim, des is des mit dem Film vo da Bruckn, keman in Brummen vorbei, wo’s meim Autoatlas noch links auf Bronkhorst umegeht. Links geht aba nix. Ois fahr i bis Leuvenheim und drah um und fahr zruck auf Brummen bis da Kreisl kimmt. Da schdäd a Schäidl Richtung Ortsmittn und ganz kloa Bronkhorst. Oiso eine auf Brummen. Bloß in da Ortsmittn beim Kreisvakehr schdäd nix mehr vo Bronkhorst! Es is fast wia in Soizburg, do find ma aa schwaar wieda ausse. Oiso such ma in da easchtn Schdrass, nix is, umdrahn! Dann in der nachstn, umdrahn! Dann in da drittn, do is a Schäidl noch Bronkhorst! Durch durch de Siedlung, unta da Schnäistrass durch, rechts auf des Strassal ume, wo lauta Radlfahra fahrn, zwoa Kilometa dahi. Aufamoi hört de Schdrass auf. Aba dann siech i a kloane Fähre mit lauta Radlfahrer und Fußgäng drauf und a Schäidl bis zehn Tonnen. Mei Ope is ned so schwaar, oiso fahr i auffe. Drei Euro kost‘s, oan pro Person, oan fürs Auto. Und in dreißg Sekundn san ma entahoib da Issel, so hoaßt der Fluss. Vorher kimmt aba no a hunded Meta langa Flussfrachta. Ent geht des Schdrassal weida und scho kimmt Bronkhorst: drei Straße, oane geht durch, zwoa Wirtschoftn mit Turistn heraußen, oa Schmuckgschäft, zwoa Galerien, a Kiosk mit Kaas, Bärndreck und wos ma sunst no so an Turistn vakafft, dann no a boor Bauernhöf. In da Mittn a Kirchal, wos de Burgkapäin war. Aba de Burg vo de Herren von Bronkhorst is nimma do, de is scho vor hundafuchzg Johr obgrissn worn. De Kirch is aa koa Kirch mehr, sondan a Ausschdellungsraum mit Hausfrauenmalerei. Aba in Wikipedia schdäht drin, dass Bronkhorst seit 1482 a Schdod is, und ned de kleanste, sondan grod de viertkleanste vo Niederlande und des mit fünfaachzg Einwohner. Aba i moan, kleana geht nimma! Und wenn ma mi frogt, ob ma dort gewen sein muaß, dann sog i: des ned, aba gsuacht und gfundn muaß ma’s hom. Wenn ma wos suacht, find ma oft väi mehra, ois des, wos ma gsuacht hod.

Des moant