Liabe Kultuaredaktion,
endlich is da easchde Advent. Auf geht’s mit da schdaaden Zeit! Aa z’Rousnam san gestan de Glühweindägl im Christkindlmarkt ozapft worn. In Gschdod schoppan se de Leit, wo auf d’Fraueninsl umme meng. De werd vo de Adventsturistn erobert. Aba dort werd aa wos geboten. De ganze Insl is a Adventsmarkt. Im oidn Münsta geht’s adventlich oba, mit’m Binda Woifgang, der Gschichtl liest, und mit boarische Gsangl und klassischer Adventsmuse. Draußn gibt’s dazu no a Iwänt-Bühne. Unter dem Motto „Night is coming“, wos auf Deitsch „Finsta werd’s“ hoaßt, schbäit de Bänd „Bayrisch Creme“ bluesige Weihnachtsliadl. Entam Sää, auf de Schären in Schdock, is Christbaamdaff. Ned vom Pfarra, sondan passendaweis vom Kneipp-Varein. Ob do de Christbaam an Chiemsä eidaucht wern, damits länga hoitn, oda oab mitm Sääwossa bloß de Kerzn glöscht wern, woaß i net. Aba es is jedenfois wos los, es is ja aa Advent.
Aa bolidisch basst ois dazua. Es muaß ja aa so sei, damit dann da Weihnachtsfriede umso größa is, wenn a kimmt. Do ghört se vorher no amoi gscheid gfetzt. Meng muaß ma se easchd am Heiliomd wieda. Aba wos werd uns dann do no erwartn? Boid singa ma nimma „Gott mit dir du Land der Bayern“, sondern „Gott mit dir du Land der Franken“, wenn da Horst nimma mog und mir vo am Frankn übanomma wern, mog a Markus oder Joachim hoaßn.
Und des mit dem Glüfosat is Weihnachtn ä wurscht. Do muaß ma se wegam Insektnrückgang iatz gor ned so aufreng. An Weihnachtn fliagt ä kaam a Biene und a Schmetterling glei gor ned, höchstens a Engal und de san resistent.. Außerdem ham mia in Bayern ja aa a Tradition. Hod ned de Biermöslblosn scho vor üba dreißg Johr scho gsunga:
„Gott mit Dir, Du Land der BayWa,
deutscher Dünger aus Phosphat,
über Deinen weiten Fluren
liegt Chemie von fruah bis spat.
Und so wachsen Deine Rüben,
so ernährest Du die Sau;
Herrgott, bleib‘ dahoam im Himme,
mia habn Nitrophoska Blau!“
Und da Landwirtschaftsminista Schmidt schaut, wia ma de Woch gsehng ham, weida auf unsa guade oide boarische Ackerbautradition. Und so kon ma frei noch Ludwig Thoma singa:
Auf’m Fäid is so staad,
Alle Bienen vawaht,
Alle Schmetterling vatriebn,
Is koa Bleamal net bliebn.
Ja, do waar mia iatz aba a bissal mehra Trube, so wia im Christkindlmarkt auf da Fraueninsl, scho liaba.
Des moant
Euer Kultualeser
Vinzenz Summerer