Liabe Kultuaredaktion,
morgn is de Herbstfestzeit vorbei. Endlich hamma wieda Zeit füa de Kultua und aa füan Woihkampf, denn in zwoa Wocha is scho de Woih. Bis iatz merkt ma ja ned väi, aba de Bolidika ham se ja scho aa Müah gem, dass ma‘s gschbannan. Sie san sogor in de Bierzäita erschienen, ned bloß zum Dringa und Essn, sondan dass ma‘s siecht und dass ma siecht, dass sie ganz noh beim Voik san.
Und wos is iatz? Iatz hob i bei Eich glesn, dass sie kimmt, mitten im Woihkampf. Bessa gsogt, sie soi kema. Tausende Leit wern erwartet. Punkt hoibe fünfe soid‘s do sei, ned in Rousnam, sondan in Untaflossing.
Aba wo is Untaflossing? Und wer kimmt? Unterflossing ist natürlich neba Obaflossing und glei auf da andan Seitn is drentan Inn Mäihdarf, wo de dortign Einheimischn aa Muihdorf dazua song. Und kema duad mitten im Woihkampf ned irgendwer, sondan es erscheint de Maria. So hod‘s wenigstens da italienische Seher Salvatore Caputa gsogt. Do werd a s’ sehng, hod a gmoant. Schau ma amoi!
Aba wenn de Maria heid grod ned Zeit häd, dann hod se zumindest füa Diensdog in Rousnam a andare Botin, quasi, a Engelin ogsogt, wenigstens dem lateinischn Nama noch – de Angela. De kimmt zwar ned vom Himme, sondan vo Berlin, aba des wenigstns vielleicht ganz beschdimmt. In Rousnam werd‘s ja gwieß an nettn Empfang kriagn und werd ned mit Tomatn bschmissn wia drent in Ostdeitschland.
I woaß iatz ja ned warum de Maria am Samsdog erscheint, denn gestan waar ihr Feiadog Maria Geburt gwen und am Diensdog, waar ihra Namensdog, aba vielleicht hod s‘ füa Untaflossing ned andascht Zeit ghabt. Und vielleicht is ja künftig a neia Feidadog am 9. Septemba im Heiligenkalenda – Maria Erscheinung in Untaflossing!
A doppede Erscheinung in Rousnam am Deandsdog waar a ganz guad, wenn ned grod de Angela erscheina daad, sondan ihra aa glei de Maria, denn de Regierung wart aa heit no, wia scho zu de Zeitn vom Münchna im Himme, auf de göttlichn Eingebungen. Aba de Angela is ja evangelisch. Ihra erscheint nix.
I find ja, de Maria soiad ned in Untaflossing erscheinen, sondan drent im Ostn. Do waar’s no noudwendiga, bei gschätzte neinzg Prozent Ungläubige. Aba do wurad sie aa mit Tomatn bschmissn wern, wo sie doch a ehemaliga Flüchtling aus Palästina mit am unehelichn Kind is.
Dann scho liaba Untaflossing.
Des moant
Euer Kultualeser
Vinzenz Summerer